Ədliyyə Nazirliyi Zirə Qeydiyyat bölməsi - Zirə və ətraf qəsəbə sakinlərinin nikahlarının qeydiyyatı və nikahla əlaqədar tədbirlərin təşkili - evlənəcək şəxslərə tibbi müayinə və tibbi arayışın verilməsi, yeni doğulmuş körpələrin qeydiyyatı həyata keçirilir. Burada nikah üçün qeydiyyatdan keçən şəxslərin qan verməsindən ötrü bütün lazımi avadanlıqla təchiz olunmuş tibbi müayinə otağı fəaliyyət göstərir. Bölmədə valideynlərin yeni doğulmuş körpələrinə rahatlıqla ad seçməsi üçün xüsusi “touch screen” lövhə də quraşdırılıb.
Mədəniyyət Mərkəzində mövcud olan məkanlar yeni evlənənlər üçün fotosessiyalar etmək, videoçəkilişlər aparmaq, eləcə də xüsusi tədbirlər həyata keçirmək üçün geniş imkanlar verir. Əlavə olaraq, burada bəy və gəlinə milli və Avropa rəqsləri də öyrədilir. Layihənin əsas məqsədi nikah mərasiminin gözəl məkanda keçirilməsi, əcdadlarımızın mirasına bağlılıq, milli-mədəni dəyərlərin və adət -ənənələrin qorunub saxlanılmasıdır. Zirə Mədəniyyət Mərkəzi – Eko Park unikallığına sadiq qalaraq, ənənə halını alacaq daha bir ilkə imza atdı. Yeni evlilər birgə “Səadət Bağı” adlı xüsusi ayrılmış ərazidə ailə həyatlarının rəmzi olan ilk ağacı əkirlər.
